Fróðastir á Fréttablaðinu

Á miðvikudagskvöld tókust blöðin hart á í því sem skiptir máli þegar blaðamennskan er annars vegar: Að vita. Logi Bergmann Eiðsson stóð fyrir bráð-skemmtilegu pressukvöldi þar sem tekist var á í spurningaspilinu Meistarinn.

Fréttablaðið hafði vitanlega sigur en hin blöðin stóðu sig prýðilega: Blaðið, DV og Morgunblaðið.

Loftið var rafmagnað á efri hæð búllunnar Grand rokk við Smiðjustíg. Þangað hafði hinn spurningaglaði sjónvarpsmaður Logi Bergmann Eiðsson boðað lið á vegum blaðanna til keppni. Mættu fjögur lið til leiks - fulltrúar Fréttablaðsins, Mogga, Blaðsins og DV.

Atið fólst í því að keppa í nýju spurningaspili, Meistaranum. Spyrillinn var sjálfur Logi Bergmann Eiðsson sem stjórnaði keppninni af miklu öryggi. Þeir sem mættir voru til að takast á voru þeir Þórarinn Þórarinsson og Steinþór Helgi Arnsteinsson fyrir Fréttablaðið, Jóhann Bjarni Kolbeinsson og Árni Helgason fyrir Moggann, Andrés Magnússon og Brynjólfur Þór Guðmundsson fyrir Blaðið og Kormákur Bragason og Friðrik Indriðason fyrir DV.

Skemmst er frá að segja að Fréttablaðið vann keppnina örugglega. Þeir Þórarinn og Steinþór rúlluðu með léttum leik upp fyrri umferðinni.

„Ég vil nú meina að úrslitin hafi verið ráðin bara um leið og við gengum inn í húsið," segir Þórarinn og er ekki með neina uppgerðar hógværð. En í seinni umferð veittu reyndar þeir á Blaðinu Þórarni og Steinþóri harða keppni.

Sem kom viðstöddum nokkuð á óvart því í fyrri umferðinni voru þeir Andrés og Brynjólfur með allt niðrum sig - eins og sagt er. Undir lokin voru liðin hnífjöfn og spennan rafmögnuð. En á elleftu stundu höfðu Fréttablaðsmenn sigur er þeir svöruðu rétt spurningunni um hver leikstýrði nýlegri kvikmynd um ofurmennið Hulk. Þar má segja að þeir hafi báðir verið á heimavelli, þessir annars víðfróðu menn, Þórarinn og Steinþór, enda báðir miklir bíóböffar. Svöruðu Ang Lee og úrslitin voru ráðin.

„Þetta var mjög skemmtilegt. Spilað samkvæmt svokölluðum varíanti. Sem þýðir að reglunum er breytt reglulega. Nýjar leikreglur kynntar," segir Logi Bergmann sem er mjög ánægður með hvernig til tókst. „Mikilvægt að prófa spilið á hópi bessservissera. Og sjá að það virkar vel í þá. Það fundust mér mikil meðmæli með spilinu."