Grasrótar grínistinn

„Er hann svangur?, ég er nefnilega að sjóða pylsur ef hann vill,“ segir Steinþór Hróar Steinþórsson, þegar blaðamaður segir honum að ljósmyndari sé á leiðinni til hans. Steinþór hefur slegið í gegn meðal netverja með gamansemi sinni undanfarin misseri, en með aðstoð myspace.com og youtube hefur hann dreift grínlögum og sketsum við góðar undirtektir.

„Vinir mínir voru flestir í tónlist, en á því sviði hef ég takmarkaða hæfileika og áhuga. Svo á meðan þeir vinna að list sinni og reyna koma henni á framfæri, geri ég það sama með grínið mitt,“ segir Steinþór um hvernig gamanað hafi þróast og æxlast. Steinþór er 22 ára gamall, búsettur í Mosfellbsæ og hefur starfað við fjölmiðla síðastliðinn ár. Í sumar ritstýrði hann tímaritinu Flass og var einnig með útvarpsþátt á samnefndri stöð.

Í haust sagði hann skilið við útvarpsstöðina til þess að starfa í kvikmynd Guðnýjar Halldórsdóttur, Veðramót. „Kvikmyndagerðin heillar mig mikið og er það sem ég vil læra. Núna er ég að skrifa handrit að stuttmynd samhliða því að skrifa í bæjarblaðið hér í Mosó,“ segir Steinþór en um hríð gaf hann út sitt eigið blað í Mosó.

Af íslensku gríni eru það þeir Tvíhöfða-frændur sem standa upp úr að mati Steinda, en annars hlær hann mest að vitleysunni í félögum sínum. „. Mér finnst vanta meira af íslensku gríni, við eigum alveg nóg af skemmtilegu fólki,“ segir hann alvarlegri enn áður. „Hei, ég verð að hætta pylsurnar eru farnar að sjóða upp úr, illa séð sko,“ og þannig lýkur viðtalinu. Þeir sem eru áhugasamir að sjá gamansemi Steinþórs er bent að fara á myspace.com/steindijr eða fletta nafninu upp á youtube.