Leynilögreglan snýr aftur

Á laugardagskvöldið var hátíð í Royal Albert Hall: endurvakin var fræg hátíð til styrktar Amnesty International. „The Secret Policemans Ball“-hátíðin var haldin aftur eftir sautján ára hlé en fyrst var hún haldin fyrir þremur áratugum.

Fyrstu samkomurnar með þessu heiti voru haldnar á áttunda áratugnum og var í fyrstu sjónvarpað beint um Bretlandseyjar. Þær voru síðan til sölu á myndbandamarkaði og hljómplötum og skópu Amnesty verulegar tekjur. Heitið vísar til ballsins, en líka til annars af tveimur eistum leynilögreglumannsins.

Fyrstu samkomurnar voru rómaðar á sínum tíma og þar mættust tvær kynslóðir breskra uppistandara: Monty Python og Peter Cook komu til móts við Rowan Atkinson, Lenny Henry og fleiri af ungu kynslóðinni. Þar voru líka fyrirferðarmiklir tónlistarmenn sem þá voru í framlínu breska rokksins. Á þeim árum stýrði John Cleese dagskránni og er talið að hátíðin hafi ráðið miklu um góðgerðarsamkomur sem haldnar voru á Bretlandseyjum áratugina á eftir: Comic Relief-söfnuna sem var árleg og loks Live Aid.

Á laugardagskvöld komu fram kraftar á borð við Eddie Izzard, Chevy Chase, Russell Brand, The Magic Numbers, The Zutons og Gorillaz. Skemmtunin var sýnd samtímis í sautján kvikmyndahúsum víða um Bretland og breska sjónvarpsstöðin Channel 4 mun sýna samantekt úr hátíðinni síðar.