Rokkið færist á Amsterdam

Talsverðar sviptingar hafa orðið í tónleikaheiminum í Reykjavík að undanförnu.

Síðustu misserin hafa þrír staðir verið helsti vettvangur tónleika á virkum dögum; Grand rokk, Gaukur á Stöng og Nasa. Nú ber svo við að efri hæðinni á Grand rokk hefur verið lokað og óvíst hvort þar verði áfram tónleikar. Gaukurinn hefur verið lokaður undanfarið og ekki er vitað hvenær hann verður opnaður aftur. Nasa er það stór staður að ómögulegt er fyrir flestar hljómsveitir að fylla staðinn. Af þessum sökum hefur nýr staður sprottið upp sem aðaltónleikastaðurinn í bænum. Þetta er Café Amsterdam, sem hingað til hefur helst verið þekktur sem harður djammstaður um helgar.

„Húsið hefur staðið ónotað fimm daga í viku svo við fögnum því að reykvískir rokkarar vilji spila hjá okkur,“ segir Ari Schröder, veitingamaður á Café Amsterdam. Tónleikaröð Smekkleysu og Reykjavík Grapevine hefur verið á fimmtudagskvöldum á Amsterdam frá því í byrjun júní og verður út sumarið. Síðasta föstudagskvöld voru sömuleiðis haldnir rokktónleikar á Amsterdam svo þróunin virðist vera í þá átt að tónleikum muni fjölga þar á næstunni. „Þessir rokkarar hafa alltaf verið að spila á sömu stöðum og vildu skipta um umhverfi. Við höfum hingað til ekki lagt okkur fram um að vera með rokkið, en eins og ég hef alltaf sagt er öllum velkomið að koma til okkar,“ segir Ari. Hann fagnar sérstaklega tónleikahaldi á virkum kvöldum en segir einnig lítið mál að hljómsveitir spili þar fyrri hluta kvölds um helgar. Ástæða þess sé sú að mesta traffíkin af fastagestum Amsterdam komi seinni part nætur um helgar.

Þorsteinn Þórsteinsson, veitingamaður á Grand rokk, segir að verið sé að vinna að endurbótum á efri hæð staðarins. Framkvæmdum lýkur 12. ágúst en ekki hefur verið ákveðið hvort haldið verði áfram með rokktónleika á staðnum. Þorsteinn segir að Airwaves-hátíðin fái vissulega sinn sess þar í október en ekki liggi fyrir hvað verði eftir það. Gaukurinn hefur verið lokaður síðustu vikuna og samkvæmt upplýsingum Fréttablaðsins er staðurinn til sölu. Það er því ljóst að gat hefur myndast á markaðnum, enda hefur það verið algengt að tvennir eða þrennir tónleikar hafi verið haldnir í viku hið minnsta.