Stunginn með hnífi í kviðinn

Karlmaður á fimmtugsaldri var stunginn í kviðinn með hnífi á veitingastað ofarlega við Laugaveg aðfaranótt laugardags. Hann var fluttur á slysadeild Landsspítalans í Fossvogi og voru sár hans svo alvarleg að hann var lagður inn á gjörgæsludeild.

Árásarmaðurinn, sem er piltur á tvítugsaldri, var handtekinn og yfirheyrður í gærdag. Að beiðni lögreglunnar í Reykjavík úrskurðaði Héraðsdómur Reykjavíkur manninn í gæsluvarðhald til föstudagsins 23. júní næstkomandi.

Tildrög hnífstungunnar eru ókunn og að sögn lögreglu er ekki talið að málið tengist fíkniefnum. Ekki fengust upplýsingar hjá lögreglu í gær hvort mennirnir þekktust eða hvert tilefni árásarinnar var. Þá vildi lögregla ekki upplýsa hvort maðurinn hefði játað verknaðinn. Árásarvopnið fannst ekki á piltinum eftir að hann var handtekinn en hnífur fannst við leit á veitingastaðnum. Öruggt er talið að þessum hníf hafi verið beitt í árásinni.

Að sögn vakthafandi læknis á gjörgæsludeild Landspítalans var ástand mannsins stöðugt í gærkvöldi. Hann þurfti ekki að gangast undir aðgerð og var vakandi. Talið er að hann nái sér að fullu.