Lagði hníf að hálsi manns

Maður á fertugsaldri lagði hníf að hálsi eins gesta hátíðarhaldanna í miðborg Reykjavíkur um miðjan dag í gær.

Sá sem varð fyrir árásinni hafði sjálfur samband við lögreglu.

Lögreglumenn ásamt tveimur sérsveitarmönnum, sem voru staddir í miðborginni, tókst að hafa upp á árásarmanninum sem lagði á flótta. Var hann handtekinn skömmu síðar og færður á lögreglustöð. Sérsveitarmennirnir báru ekki skotvopn í þessari aðgerð, að sögn lögreglu.

Maðurinn var í annarlegu ástandi og að sögn lögreglu er ekki útilokað að hann sé andlega vanheill. Málið er í rannsókn og í gærkvöld var enn óljóst hvort árásarmaðurinn þyrfti aðhlynningu á sjúkrahúsi.