Allir bátarnir enn í höfn

Hvalveiðitímabilið þetta árið hófst í fyrradag en vegna talsverðrar brælu á miðunum, hélt enginn hvalveiðibátanna út til veiða á miðin.

"Það þýðir ekkert að fara á sjó í svona veðri," segir Gunnlaugur Konráðsson, hrefnuveiðimaður á hvalveiðibátnum Trausta sem gerður er út frá Reykjavík. "Við verðum bara að bíða af okkur þessa brælu."

Veðurhorfur fyrir næstu daga gefa ekki ástæðu til bjartsýni á að veiðarnar geti hafist í bráð, en Gunnlaugur segir að veður verði að vera gott svo unnt sé að stunda veiðarnar. "Við þurfum að fara djúpt út og þá verður að vera gott veður svo að veiðin geti gengið, í gamla daga snerist þetta um að nýta þennan eina logndag sem var í hverri viku," segir Gunnlaugur.

Í ár hefur verið gefið út leyfi til veiða á um fimmtíu dýrum og býst Sverrir Daníel Halldórsson, líffræðingur við hvaladeild Hafrannsóknastofnunar, við því að kvótinn verði tæmdur í lok júlí.