Niðurgangspest á skipum

Landlæknisembættinu hafa verið að berast fregnir af svokölluðum nóróveirusýkingum um borð í skemmtiferðaskipum í Norður-Atlantshafi að undanförnu. Í júníbyrjun þessa árs geisaði magakveisa um borð í skemmtiferðaskipi sem kom til hafnar á Akureyri. Skipslæknirinn sendi saursýni úr tveimur sjúklingum um borð við komu til hafnar.

Rannsókn á veirufræðideild Landspítala - háskólasjúkrahúss leiddi í ljós sýkingu af völdum nóró­veiru. Skipið hélt sama dag og það kom til Bretlands þar sem heimahöfn þess er. Ensku sóttvarnastofnuninni var gert viðvart um rannsóknarniðurstöðuna. Ekki er vitað til þess að sýkingin hafi breiðst út fyrir norðan.

Nóróveirusýkingar hafa verið mikið vandamál á skemmtiferðaskipum sem meðal annars sigla til Íslands. Einnig hafa nóróveirusýkingar færst talsvert í vöxt hér á landi á undanförnum árum, einkum yfir sumarmánuðina. Ferðaþjónustan hefur orðið fyrir barðinu á þessum sýkingum því að hópsýkingar hafa tengst veitinga- og hótelrekstri. Þá hafa nóróveirur valdið hópsýkingum á öldrunarheimilum og sjúkrastofnunum undanfarin ár. Algengustu einkenni eru niðurgangur, uppköst sem fylgt geta kviðverkir, beinverkir, höfuðverkur og stundum vægur hiti.