Næsta lágvöruverslun við Höfn í yfir 300 km fjarlægð

Konu, sem var á ferð á Höfn í Hornafirði, blöskraði hátt verðlag á staðnum og hafði samband við Neytendasamtökin vegna málsins. Á Höfn hefur einu lágvöruverslun staðarins, Krónunni, verið lokað og nú er einungis matvöruverslun 11-11 á staðnum.

Eftir ferðina ákvað konan að gera verðsamanburð á nokkrum vörutegundum og eru þær vörur sem mestan mun hafa í töflunni. Tekið skal fram að þó að verklag verðkönnunarinnar samræmist ekki reglum Neytendasamtakanna staðfesta samtökin að innihald hennar sé rétt. Eins og sjá má í töflunni er vöruverð í verslun 11-11 á Höfn yfir sextíu prósentum hærra, þar sem verðmunurinn er mestur, en í verslun Krónunnar í Skeifunni.

Íbúi á Höfn í Hornafirði sem blaðamaður hafði samband við sagði íbúa staðarins gjarnan fara á Egilsstaði til að versla en þangað er um tveggja tíma akstur. Verslun Krónunnar var lokað nú í apríl og íbúar staðarins eru ekki ánægðir með að hafa ekki lágvöruverslun á staðnum. Íbúinn sagði að þegar hann ætti leið til Reykjavíkur notaði hann einnig tækifærið til að versla í matinn. Áætlaði hann að matarinnkaup á Höfn kostuðu hann helmingi meira eftir að Krónan hætti.