Finn fyrir nokkurri depurð

 "Ég finn fyrir nokkurri depurð í dag og það er í fyrsta sinn síðan úrslit kosninganna lágu fyrir," sagði Steinunn Valdís Óskarsdóttir, fráfarandi borgarstjóri, rétt áður en hún afhenti Vilhjálmi Þ. Vilhjálmssyni, nýjum borgarstjóra, lyklana að skrifstofu borgar­stjóra í gær.

"Ég sé vitaskuld eftir meirihlutanum og svo fannst mér sorglegt að sjá konur bera skarðan hlut frá borði í kjöri til nefnda og ráða," sagði Steinunn Valdís og gagnrýndi hvernig meirihlutinn hagaði vali sínu á fólki í nefndir.

Steinunn Valdís segist hafa átt skemmtilegan og lærdómsríkan tíma í embætti borgarstjóra. Hann hafi þó líka verið erfiður. "En ég hef unnið hér með frábæru starfsfólki og kveð það með söknuði."

Spurð hvernig henni litist á Vilhjálm Þ. í embætti borgarstjóra svaraði Steinunn Valdís því til að hann væri ágætur karl. "Ég hef þekkt hann lengi og hann hefur mikla reynslu og það hefur ekkert með hans persónu að gera að mér hugnast ekki hans pólitík eins og hún birtist okkur í nefndarkjörinu. Fólkið sem er með honum er mjög hægrisinnað í ýmsu sem lýtur að skóla-, velferðar- og jafnréttismálum og ég hef ástæðu til að óttast það."