Framsóknarmenn fá tvö af sjö fagráðum

Sjálfstæðisflokks og Framsóknarflokks tekur við völdum á borgarstjórnarfundi klukkan eitt. Á sama fundi lýkur formlega tólf ára setu Reykjavíkurlistans í meirihluta borgarstjórnar.

Á fundinum í dag verður kosið til allra helstu pólitísku embætta borgarkerfisins, forseta borgarstjórnar og formennsku helstu fagráða og nefnda. Þá verður kosið í stjórnir Faxaflóahafna, Orkuveitu Reykjavíkur, Sorpu og Strætó. Og samkvæmt regluverki borgarinnar verður borgarstjóri kosinn sérstakri kosningu en löngu er orðið ljóst að það verður Vilhjálmur Þ. Vilhjálmsson, oddviti sjálfstæðismanna. Að sama skapi er ljóst að Björn Ingi Hrafnsson, oddviti framsóknarmanna, verður formaður borgarráðs.

Síðustu daga hafa oddvitarnir og helstu samverkamenn þeirra samið um og gengið frá skiptingu embætta milli flokkanna. Samkvæmt heimildum Fréttablaðsins fær Framsóknarflokkur formennsku í tveimur af sjö fagráðum borgarinnar, framkvæmdaráði og íþrótta- og tómstundaráði. Sjálfstæðismenn fá hins vegar formennsku í menningar- og ferðamálaráði, menntaráði, skipulagsráði, umhverfisráði og velferðarráði. Auk þessara starfa þarf að manna fjölmargar aðrar nefndir og ráð, til dæmis níu hverfisráð, barnaverndarnefnd, framtalsnefnd og nýja mannréttindanefnd sem tekur við verkefnum jafnréttis­nefndar og fær útvíkkað hlutverk.

Á kjörtímabilinu munu flokkarnir skipta með sér formennsku í stjórnum Orkuveitu Reykjavíkur og Faxaflóahafna. Fyrri helming þess munu sjálfstæðismenn fara með formennsku í Orkuveitunni og framsóknarmenn í Faxaflóahöfnum. Breytingar verða svo gerðar að tveimur árum liðnum.

Oddvitar flokkanna tveggja funduðu með samflokksmönnum í gær og gerðu þeim grein fyrir sáttmála sínum um meirihlutasamstarfið næstu fjögur árin.

Vilhjálmur Þ. Vilhjálmsson verður sautjándi borgarstjóri Reykjavíkur en Páll Einarsson sýslumaður gegndi embættinu fyrstur manna. Vilhjálmur er sá borgarfulltrúi sem lengst hefur setið í borgarstjórn en hann var fyrst kjörinn 1982. Þrír taka sæti í borgarstjórn í dag sem ekki hafa setið þar áður, Björn Ingi Hrafnsson, Þorbjörg Helga Vigfúsdóttir Sjálfstæðisflokki og Svandís Svavarsdóttir, vinstri grænum.

Þá verða sjálfstæðismennirnir Gísli Marteinn Baldursson og Jórunn Frímannsdóttir aðalmenn í borgarstjórn en þau voru varamenn á síðasta kjörtímabili. Júlíus Vífill Ingvarsson, Sjálfstæðisflokki, sest á ný í borgarstjórn og Björk Vilhelmsdóttir og Dagur B. Eggertsson sitja þar nú fyrir Samfylkinguna en Björk var fulltrúi vinstri grænna á Reykjavíkurlistanum og Dagur stóð utan flokka.