Úrskurður kærður til Hæstaréttar

Héraðsdómur Reykjavíkur hafnaði í gær kröfu Gests Jónssonar og Jakobs Möller um að Sigurður Tómas Magnússon, settur ríkissaksóknari í Baugsmálinu, og Helgi I. Jónsson, dómstjóri Héraðsdómur Reykjavíkur, beri vitni fyrir dómi.

Gestur, verjandi Jóns Ásgeirs Jóhannessonar, og Jakob Möller, verjandi Tryggva Jónssonar, vildu kalla Sigurð Tómas og Helga fyrir dóminn sem vitni til þess upplýsa um samskipti sín í aðdraganda þess að aftur væri ákært í málinu vegna ákæruliða sem þegar hafði verið vísað frá.

Gestur Jónsson sagði fyrir dómi að það væri nauðsynlegt fyrir framgang málsins að fá skýr svör við því, "hvernig það mætti vera að settur ríkissaksóknari hafi haft samskipti við dómstjóra um skipan dómara, áður en ákæra var gefin út", eins og Gestur sagði fyrir dómi.

Gestur vildi einnig fá svör við því "hvers vegna verjendur sakborninga hefðu ekki verið hafðir með í ráðum", þegar þessi mál voru rædd.

Áður en ný ákæra var gefin út átti Sigurður Tómas samskipti við dómstjóra í málinu og gerði grein fyrir því að dómari í fyrra Baugsmálinu, Pétur Guðgeirsson, væri hugsanlega vanhæfur til þess að dæma í málinu þar sem hann væri tengdur einu vitnanna fjölskylduböndum. Dómstjóri í málinu féllst á það að Pétur væri vanhæfur til þess að dæma í málinu og var Arnaldur Ísberg skipaður dómari í hans stað.

Sigurður Tómas vísaði því á bug að hann hefði haft afskipti af því hver hefði verið skipaður dómari í málinu. Hann hefði einungis bent á tengsl Péturs, dómara í fyrra Baugsmálinu, við eitt þeirra vitna sem hann teldi mikilvægt að kalla fyrir málinu.

Sigurður Tómas hafnaði því einnig að samskipti hans og dóm­stjóra í málinu hefðu verið með einhverjum hætti óeðlileg.

Sakborningar í Baugsmálinu hafa krafist þess að nýrri ákæru verið vísað frá dómi. Í fyrri ákærunni var 32 af 40 liðum vísað frá en dómurinn tók fyrir átta ákæruliði. Ákærendur er við komu í liðunum átta voru allir sýknaðir.

Málflutningur vegna frávísunarkröfu var á dagskrá héraðsdóms á fimmtudaginn en honum hefur verið frestað þar til niðurstaða Hæstaréttar vegna kærunnar liggur fyrir.