Skrefi nær álveri

Frumniðurstöður úr umhverfismati eru jákvæðar og góðar líkur eru á að við fáum þá orku sem til þarf svo ég er afar bjartsýnn og sannfærður um að hér rísi okkar næsta álver, sagði Logan W. Kruger, forstjóri Century Aluminum, móðurfyrirtækis Norðuráls, sem vill reisa 150 þúsund tonna álver í Helguvík árið 2010 og stækka það í 250 þúsund tonna álver þegar fram líða stundir.

Í gær var undirrituð viljayfirlýsing milli Norðuráls annars vegar og Hitaveitu Suðurnesja og Orkuveitu Reykjavíkur hins vegar um raforkusölu til fyrsta áfanga fyrirhugaðs álvers í Helguvík en það hefur hingað til verið einn mesti þrándur í götu þessa verkefnis. Hafði Orkuveitan áður hafnað aðild að málinu en með frekari rannsóknum og borunum þykir nú sýnt að fyrirtækið geti mögulega afgreitt allt að hundrað megawöttum fyrir fyrsta áfanga álversins að fjórum árum liðnum.

Guðmundur Þóroddsson, forstjóri Orkuveitu Reykjavíkur, ítrekar þó að um viljayfirlýsingu sé að ræða og í henni felist engin skuldbinding. Hitaveita Suðurnesja hefði annars ekki getað afgreitt þá orku sem á þarf að halda til að taka fyrsta áfanga álversins í notkun á þeim tíma sem um er rætt. Að því leyti er um mikilvægt skref að ræða. Þetta er ekki skuldbindandi yfirlýsing heldur aðeins ákvörðun um að fara í ákveðin verkefni til að reyna að verða við beiðnum um orku en við getum ekki ábyrgst afhendingu og erum ekki að skuldbinda okkur á nokkurn hátt.

Árni Sigfússon, bæjarstjóri Reykjanesbæjar, sagði að með yfirlýsingunni væri mestu hindruninni við byggingu álvers rutt úr vegi. Ríkisstjórnin hefur sagt að þetta sé sá þrándur sem þurft hafi að ryðja úr vegi en hér eru menn að finna lausn á því. Hvað Norðurál varðar hafa þeir verið að bíða þess að þetta liggi fyrir og að gengið verði frá umhverfismati. En þeir hafa sagt og lýst yfir að að uppfylltum þessum skilyrðum séu þeir reiðubúnir og ég dreg ekki í efa að það sé rétt.

Forstjóri Century Aluminum segir að fyrirtækið muni gæta þess að bygging álversins reynist efnahagskerfi landsins ekki erfið. Við erum að horfa til uppbyggingar þessa álvers eins og annarra slíkra í litlum skrefum svo áhrifin á efnahagskerfi landsins verði minniháttar. Við byrjum á að byggja 150 þúsund tonna álver og stækkum það svo í áföngum þegar fram líða stundir svo að afkastagetan verði 250 þúsund tonn á síðari stigum.