160 ker tekin úr notkun

Stjórnendur álversins í Straumsvík ákváðu nú í morgun að taka öll 160 kerin í kerskála þrjú úr notkun, en í gærkvöldi var vonast til að aðeins 120 ker væru ónothæf eða jafnvel ónýt.

Þetta ástand skapaðist vegna bilunar í spennum í aðveitustöð, sem olli því að ekkert rafmagn komst á kerin í níu klukkustundir, en við slíkar aðstæður eyðileggjast þau.

Um það bil 40 prósent allrar framleiðslunnar í Straumsvík er í skála þrjú, þannig að framleiðsla álversins í heild hefur minnkað um hátt í helming og fyrir liggur að það muni taka margar vikur eða nokkra mánuði að koma framleiðslunni í samt lag á ný. Það er því ljóst að tjónið nemur mörg hundruð milljónum króna bæði vegna tjóns í kerskálanum og framleiðslutaps. Orsakir bilunarinnar liggja ekki fyrir.