Frumvarp til laga um frjálsa för verkafólks rætt á þingi

Nú stendur yfir á þingi önnur umræða um frumvarp um breytingar á lögum um frjálsan atvinnu- og búseturrétt launafólks innan EES og um atvinnuréttindi útlendinga. Lögin eiga að taka gildi 1. maí og því liggur á að samþykkja þau.

Með lögunum fá ríkisborgarar nýjustu aðildarríkja Evrópusambandsins rétt til að koma hingað og ráða sig í vinnu án atvinnuleyfis frá og með mánaðamótum. Þetta er fólk frá Eistlandi, Lettlandi, Litháen, Póllandi, Slóvakíu, Slóveníu, Tékklandi og Ungverjalandi. Samkvæmt bráðabirgðaákvæðum í lögunum verða atvinnurekendur þó að tilkynna til Vinnumálastofnunar þegar ríkisborgari frá einhverjum ríkjanna átta er ráðinn til vinnu. Reiknað er með að frumvarpið verði samþykkt síðar í dag.

Verkalýðshreyfingin er ekki sátt við frumvarpið, þar sem ekki er reiknað með aðild verkalýðsfélaga að eftirliti með þessu fólki og ekki tryggt að fólkið fái greidd laun samkvæmt íslenskum kjarasamningum.