Vill að lífeyrissjóðirnir komi að uppbyggingu húsnæðis fyrir eldri borgara

70,8% þjóðarinnar er hlynt eða frekar hlynt því að lífeyrissjóðirnir komi að uppbyggingu húsnæðis fyrir eldri borgara, samkvæmt nýlegri Gallup könnun. Helgi í Góu tekur í sama streng og vill að stjórnendur lífeyrissjóðanna fari að skila hluta tekna þeirra aftur til borgaranna.

Helgi Vilhjálmsson, betur þekktur sem Helgi í Góu, kostaði könnunina sjálfur. Hann situr í stjórn aðstandendafélags aldraðara og er ötull baráttumaður fyrir hagsmunum aldraðra. Samkvæmt könnun Gallups eru tæplega 71% þátttakenda hlyntir því að lífeyrissjóðirnir byggi eða reki húsnæði fyrir eldri borgara. Konur voru heldur hlynntari þess háttar fyrirkomulagi en karlar. Yngsti aldurshópurinn 16-24 ára er mest hlyntur og stuðningur þeirra sem einungis hafa grunnskólapróf er meiri en þeirra sem hafa framhaldspróf eða háskólamenntun. Stuðningurinn er einnig meiri meðal þeirra sem lægstar hafa tekjurnar en þeirra sem eru með hæstu tekjurnar. Helgi vill sjálfur að lífeyrissjóðirnir greiði hluta tekna sinna til uppbyggingar og reksturs húsnæðis fyrir eldri borgara.

Helgi leggur til að 1% tekna sjóðanna sé nýtt til uppbyggingar húsnæðis en honum reiknast að það séu um 14 milljarðar króna. Til samanburðar tekur hann um 1% af súkkulaðirúsínum úr skál og það virðist ekki hafa merkjanleg áhrif á magnið sem í skálinni er.

Alls tóku 1352 einstaklingar þátt í könnuninni og var svarhlutfall tæp 60%. Þátttakendur eru á aldrinum 16-75 ára en úrtakið var handahófsvalið úr þjóðskrá.