Mótmæla fyrirhuguðum hrefnuveiðum

Hvalaskoðunarsamtök Íslands mótmæla harðlega þeirri ákvörðun sjávarútvegsráðherra að leyfa veiðar á 50 hrefnum hér við land á þessu ári. Greint var frá þessari ákvörðun sjávarútvegsráðherra í gær og eiga veiðarnar að hefjast á næstu dögum.

Þær eru liður í hvalarannsóknaáætlun Hafrannsóknastofnunar sem lögð var fyrir vísindanefnd Alþjóðahvalveiðiráðsins árið 2003. Síðan þá hafa um eitt hundrað hrefnur verið veiddar yfir sumartímann en áætlunin gerði ráð fyrir veiðum á 200 hrefnum, 200 langreyðum og 100 sandreyðum.

Hvalaskoðunarsamtök Íslands sendu frá sér tilkynningu í dag þar sem þau lýsa yfir hörðum mótmælum sínum við fyrirhuguðum veiðum í sumar. Samtökin mótmæla jafnframt fullyrðingu Hafrannsóknarstofnunar að þessi ákvörðun sé í samræmi við hvalarannsóknaráætlun Hafró. Staðreyndin sé nefnilega sú að hvorki langreyðar né sandreyðar hafi verið veiddar samkvæmt þeirri áætlun, og aðeins örfáar hrefnur á ári. Það sé því rangt að halda því fram að þessar veiðar séu í samræmi við þær tillögur sem lagðar voru fyrir vísindanefnd Alþjóða hvalveiðiráðsins. Þar fyrir utan hafi tillögurnar aldrei verið samþykktar af vísindaráðinu, né af alþjóða hvalveiðiráðinu.

Hvalaskoðunarsamtökin árétta jafnframt að Samtök Ferðaþjónustunnar og aðalfundir Ferðamálaráðs hafi ítrekað mótmælt hvalveiðistefnu stjórnvalda og farið þess á leit að sú stefna verði endurskoðuð, enda liggi fyrir að veiðarnar hafi þegar skaðað eina vinsælustu afþreyingargrein íslenskrar ferðaþjónustu, hvalaskoðun, með beinum hætti.