Samkeppniseftirlitið gerði einnig húsleit hjá Kreditkortum

Eftir að Samkeppniseftirlitið gerði húsleit hjá VISA Ísland í gær fóru fulltrúar stofnunarinnar í höfuðstöðvar Kreditkorta hf. og gerðu upptæk gögn.

Húsleit var gerð hjá VISA í gær vegna rökstudds gruns Samkeppniseftirlitsins um að fyrirtækið væri að brjóta samkeppnislög.

Starfsmenn Samkeppniseftilitsins voru mest allan gærdaginn hjá VISA og fóru í gegnum tölvur og ýmis gögn.

Eftir að starfsmenn Samkeppniseftirlitsins höfðu lokið störfum á skrifstoum VISA fóru þeir til Kreditkorta hf. sem er með með Mastercard og Maestrokort.

Ragnar Önundarson, framkvæmdastjóri Kreditkorta, segir starfsmennina hafa komið klukkan fimm. Hann telur ástæðu húsleitarinnar líklega þá að fulltrúar Samkeppniseftirlitsins hafi rekið augun í eitthvað í húsleitinni hjá VISA sem gaf þeim tilefni til að fara inn hjá Kreditkortum. Ragnar segist ekki vita hvaða gögn þeir skoðuðu. Hann segir Kreditkort eiga í samstarfi við VISA í mörgum málum sem þeir telji ekki samkeppnismál, svo sem samnýtingu á posakerfum.

Halldór Guðbjarnason, framkvæmdastjóri VISA, sagði í gær að hann væri þess fullviss að danska greiðslumiðlunin PBS hafi staðið á bak við húsleitina.

PBS er í eigu danska seðlabankans, danskra banka og sparisjóða og á í samkeppni við VISA og Kreditkort á Íslandi. Umboðsaðilli PBS á Íslandi er kortaþjónustan. Gunnar Bæringsson, einn af forsvarsmönnum þess fyrirtækis, segir ekkert hæft í þessum ásökunum og að fyrirtækið hafi ekki lagt inn kærur á hendur VISA.

Samkvæmt heimildum NFS hafa kvartanir borist frá verslunareigendum um að VISA hafi verið að reyna að koma í veg fyrir viðskipti þeirra við PBS. Ekki er þó vitað á þessari stundu hvort að húsleit Samkeppisyfirvalda tengjist þessum kvörtunum. Einnig hefur verið bent á að nú séu í gangi kannanir samkeppnisyfirvalda víða um heim á kortastarfsemi og hafa samkeppnisyfirvöld verið hvött til að taka þátt í þeim. Forstjóri Samkeppniseftirlitsins hefur hins vegar lýst því yfir að rökstuddur grunur sé um að VISA hafi brotið samkeppnislög og því líklega annað að baki en almennt átak.

Páll Gunnar Pálsson, forstjóri Samkeppiseftirlitsins, segir ekkert hægt að segja til um hvenær niðurstöðu verði að vænta.