Unnið samkvæmt álitsgerð

Jón Kristjánsson, fráfarandi félagsmálaráðherra, segir vinnu við breytingar á Íbúðalánasjóði vera vel á veg komna en líklegt má telja að breytingarnar nái fram að ganga á þessu ári.

"Það er verið að fara yfir álitsgerð starfshóps um breytingar á Íbúðalánasjóði og sú vinna er í farvegi. Það er stefnt að því að ljúka vinnunni sem fyrst en það kemur í hlut nýs ráðherra að leiða breytingarnar til lykta," sagði Jón að loknum ríkisstjórnarfundi í gær en þetta var hans næst síðasti fundur í ríkis­stjórn, þar sem hann hefur ákveðið að draga sig út úr stjórnmálum eftir langan feril sem stjórnmálamaður. Magnús Stefánsson tekur við embætti félagsmálaráðherra.

Tillögur starfshópsins gera ráð fyrir því að Íbúðalánasjóði verði breytt í eins konar heildsölubanka sem láni fé til banka og sparisjóða, sem sjá um að þjónusta einstaklinga og fyrirtæki vegna húsnæðiskaupa.

Forsvarsmenn banka og sparisjóða hafi lengi vonast eftir því að breytingar verði gerðar á Íbúðalánasjóði, með það fyrir augum að samkeppnisstaða lánastofnana gagnvart Íbúðalánasjóði verði bætt. Fulltrúar banka og sparisjóða komu að vinnu við gerð tillagna um breytingar á Íbúðalánasjóði.