Jafnt hjá Grindavík og Þrótti

Leikur Grindavíkur og Þróttar fór rólega af stað, en bæði lið mættu þó nokkuð ákveðin til leiks og voru fjórir leikmenn áminntir á fyrstu þréttán mínútum leiksins. Þrótturum gekk ágætlega að ná tökum á leiknum með Pál Einarsson í aðalhlutverki inn á miðjunni. Varnarleikur Grindvíkinganna var ekki nægilega góður, en þeir voru fyrir leikinn ekki búnir að fá á sig mark í þrjá leiki í röð. Þróttarar komust yfir á 16.mínútu með glæsilegu marki hjá Halldóri Arnari Hilmissyni, sem skoraði með góðu langskoti efst í hægra markhornið. Eftir markið róaðist leikurinn nokkuð og var tíðindalítill fram að hálfleik. Milan Stefan Jankovic gerði taktíska breytingu á liði sínu í seinni hálfleik, en þá spilaði hann með þrjá menn í vörn, fimm á miðjunni og tvo frammi. Þetta heppnaðist ágætlega og voru Grindvíkingar frískir til þess að byrja með. Á 68.mínútu tókst Magnúsi Þorsteinssyni að jafna leikinn eftir að Óskar Hauksson hafði lyft honum fallega inn fyrir vörnina. Magnús fékk þar boltann og náði að vippa boltanum í markið. Vel að verki staðið. Óskar Hauksson, sem kom inn á í fyrri hálfleik fyrir Eyþór Einarsson, var Þrótturum erfiður í seinni hálfleik en hann gjörbreytti leik Grindvíkinga til hins betra. Bæði lið reyndu að spila boltanum með jörðinni og var ánægjulegt sjá það, en það er því miður sjaldséð að lið nái að einbeita sé að stuttum samleik allar níutíu mínúturnar. Páll Einarsson stóð upp úr í jöfnu liði Þróttar en Magnús Þorsteinsson og Óskar Hauksson voru frískastir heimamanna. Ásgeir Elíasson var ekki ánægður með niðustöðu leiksins. "Við áttum að gera betur í dag. Við spiluðum vel í fyrri hálfleik og hefðum átt að skora fleiri. En vonandi kemur það í næsta leik."Óskar Hauksson gjörbreytti leik Grindvíkinga í seinni hálfleik. "Við vorum heppnir í dag að ná stigi. En við náðum aðeins að laga þetta í seinni hálfleik en hefðum átt að setja meiri pressu á þá síðustu mínútur leiksins."