Öndum að okkur verkfallslofti

„Eftir fundi með atvinnurekendum og ríkisvaldi tel ég helmingslíkur á að samningar fari í sundur," sagði Sigurður Bessason, formaður Eflingar, á ársfundi Alþýðusambands Íslands í gær. Á fundinum voru lögð fram drög að ályktunum þar sem einna mest bar á ályktunum um kjaramál og skattamál. Sigurður var ómyrkur í máli og sagði að sambandið hafi haft rangt fyrir sér með því að gera ráð fyrir að ríkisstjórnin yrði samstíga launafólki í að viðhalda stöðugleika. „Við stöndum nú frammi fyrir verðbólgu sem hvergi var hægt að sjá fyrir þegar kjarasamningar voru gerðir." Í drögum að ályktun um kjaramál segir að ef ekki náist viðunandi lausn við endurskoðun kjarasamninga telji ársfundurinn einsýnt að til uppsagnar samninga muni koma. Frestur til þess að segja upp kjarasamningum rennur út 10. desember en eins og fram kom eftir fund leiðtoga verkalýðsfélaga með forsætisráðherra á þriðjudag verður það í höndum aðildarfélaga ASÍ hvort samningum verði sagt lausum, strax eftir 15. nóvember. „Ég treysti því að ríkisstjórnin skilji sinn vitjunartíma og nálgist þetta mál hratt því að tíminn er naumur og ef menn ætla að ná niðurstöðu í þessu máli þá verður það að gerast á næsta hálfa mánuðinum," sagði Sigurður enn fremur. Undir þessi orð Sigurðar tók næsti ræðumaður, Örn Friðriksson, og sagði: „Við öndum nú að okkur góða verkfallsloftinu. Ég er að tala um það í alvöru. Ef það á að taka mark á okkur er það óhjákvæmilegt að búa sig undir átök í haust. Það þarf ekkert að rifja upp fyrir þessum hópi að við kunnum að taka slag." Í drögum um ályktun um skattamál skorar fundurinn á ríkisstjórnina og Alþingi að gæta hagsmuna láglaunafólks. „Forgangsverkefnin eru að lækka virðisaukaskatt á matvæli, hraða hækkun barnabóta og taka upp lægra skattþrep á lægri tekjur," segir í drögunum. Hugmyndin er að lækka matarskattinn úr fjórtán prósentum niður í sjö. Til þess að vega upp á móti er lagt til að fjármagnstekjuskattur verði hækkaður úr tíu prósentum í tuttugu.