Fá ekki lán á landsbyggðinni

"Íslenski bankinn neitaði okkur um lán því að verksmiðjan á að rísa á landsbyggðinni," segir Michael Ryan, framkvæmdastjóri írska fyrirtækisins Marigot, sem reisa mun kalkþörungaverksmiðju á Bíldudal ásamt sanddælingarfyrirtækinu Björgun.„Það hefði verið auðsótt mál að fá lánið hefði verksmiðjan átt að rísa í Reykjavík," bætir hann við. Fyrirtækið á stóran hlut í tólf fyrir-tækjum víða um heim og hefur á 35 ára sögu sinni komið á fjórða tug fyrirtækja á kopp með góðum árangri að sögn Ryans. „Þetta er hins vegar í fyrsta sinn sem okkur er hafnað um lán vegna verksmiðju sem við hyggjumst byggja," útskýrir hann. „Frami fyrir bankanum erum við landsbyggðarfólkið klárlega annars flokks," segir Bílddælingurinn Jens Valdimarsson, fyrrum framkvæmdastjóri fiskvinnslunar Bílddælings. „Heimamenn hafa ekki nokkur tök á því að fjárfesta í nokkrum sköpuðum hlut; þeir geta ekki einu sinni endurfjármagnað eldri lán sín og eru þess vegna að borga sextán til átján prósenta vexti meðan fólkið fyrir sunnan er kannski að borga fjögur prósent. Enda sjáum við í hvað stefnir hér í Arnarfirði; stóreignamenn úr Reykjavík eiga hér skeiðvöll og eignir upp á nokkur hundruð milljónir en á meðan fá heimamenn ekki einu sinni lán til að lappa upp á húsin sín, hvað þá fimmtíu milljónir til að reka fiskvinnslu," segir Jens. Þrátt fyrir bakslagið vegna höfnunar bankans hefur verið ákveðið að reisa verksmiðjuna á Bíldudal. „Okkur hefur tekist að fjármagna þetta eftir öðrum leiðum. Öll tæki og tól eru tilbúin svo ég á von á því að stofnsamningur verði undirritaður innan hálfs mánaðar," segir Ryan. Hvorki Sigurður Helgason, framkvæmdastjóri Björgunar, né Ryan vilja láta uppi um hvaða banka ræðir en Fréttablaðið hefur heimildir fyrir því að það sé Landsbanki Íslands. Sigurður segir að innan fárra vikna verði hafist handa við að reisa verksmiðjuna og ætti framleiðsla að geta hafist snemma næsta vor.