Sífellt fleiri börn hringja í 112

„Hér hringja börn og fullorðnir. Tilfinningin segir okkur að hér hringi börn oftar nú, heldur en var framan af eftir að þetta samstarf komst á," segir Kristján Hoffmann, gæðastjóri Neyðarlínunnar 112. Nú er liðið vel á annað ár síðan samstarf Neyðarlínunnar og Barnaverndarstofu hófst. Það felst í því að Neyðarlínan tekur við símtölum frá öllum þéim sem vilja tilkynna grun sinn um ofbeldisbeitingu gagnvart börnum, allan sólarhringinn, alla daga árið um kring. „Fólk á öllum stigum þjóðfélagsins hringir," segir Kristján. Hann bætir við að Þessi þjónusta sé kynnt í skólum landsins, til að mynda með veggspjöldum á kennarastofum og göngum. Á þeim koma fram ítarlegar upplýsingar um úrræði sem Neyðarlínan býður upp á og í hvaða tilvikum eigi án tafar að hafa samband við hana. Þórhallur Ólafsson framkvæmdastjóri hjá Neyðarlínunni 112 segir að reynslan af þessari þjónustu hafi gefið mjög góða raun. „Við höfum fengið hingað tilkynningar um mál, sem hafa skipt sköpum," segir hann. „Það er mjög mikilvægt að fá slíkar upplýsingar, þannig að hægt sé að vísa þeim áfram til barnaverndarnefnda." Hann segir enn fremur, að þegar Neyðarlínunni berist tilkynningar um ofbeldi gegn börnum séu helstu upplýsingar skráðar og þeim komið til viðkomandi barnaverndarnefndar. Að öðru leyti séu starfsmenn bundnir algjörum trúnaði. Sé barn talið vera í hættu er barnaverndarstarfsmaður tafarlaust kallaður út. Í þeim tilvikum sem aðstæður barnsins eru ekki eins brýnar er upplýsingum komið áfram í upphafi næsta vinnudags. „þetta er fyrsta landið í Evrópu þar sem Neyðarlínan 112 tekur að sér slíka þjónustu," segir Þórhallur. „Markmiðið er fyrst og fremst að auðvelda að tilkynning um ofbeldishegðun gegn barni komist til barnaverndarnefndar hvenær sólarhringisins sem er. Fólk á að hringja hafi það minnsta grun um slíkt," bætir hann við og undirstrikar tilkynningarskyldu almennings og fagfólks samkvæmt barnaverndarlögum. Þórhallur sér um tölulega vinnslu gagna, meðal annars hvað varðar innhringingar vegna gruns um ofbeldi gagnvart börnum. Hann segir þær tölur vera í vinnslu og því ekki hægt að gefa þær upp að sinni.