Aðgerðum Norðmanna vísað til Haag?

Svo kann að fara að spænskur útgerðarmaður skjóti íslenskum stjórnvöldum ref fyrir rass og vísi einhliða stjórnunaraðgerðum Norðmanna á hafsvæðinu við Svalbarða til Alþjóðadómstólsins í Haag, eins og íslensk stjórnvöld hafa velt fyrir sér að gera árum saman. Tilefnið er að norska strandgæslan tók tvo spænska togara nýverið að meintum ólöglegum veiðum við Svalbarða en ólíkt því að sleppa þeim, eins og rússneska togaranum um daginn, færði strandgæslan spænsku tograna til hafnar í Noregi þar sem réttað var yfir skipstjórunum og þeir dæmdir til sektar. Spænski útgerðarmaðurinn hefur nú áfrýjað dóminum til æðra dómstigs í Noregi á þeim forsendum að að Norðmenn hafi ekki yfirráðarétt eða lögsögu á Svalbarðasvæðinu, eða með sömu rökum og íslensk stjórnvöld hyggjast nota ef þau vísa málinu til Haag. Niðurstöðu æðra dómsstigs í Noregi ætlar spænski útgerðarmaðurinn hiklaust að vísa til Alþjóðadómstólsins, ef hann hafnar þessum skilningi, og yrði það þá prófmál fyrir honum. Eins og greint var frá á Bylgjunni í gær hafa íslensk stjórnvöld undirbúið slíkan málatilbúnað frá því í fyrrahaust, meðal annars með aðstoð erlendra hafréttarfræðinga, en ekki enn tekið ákvörðun um málssóknina.