Bjart og fagurt veður á Flateyri

Flateyringar minnast þess í dag að tíu ár eru liðin frá snjóflóðinu mikla sem kostaði tuttugu manns lífið. Bjart og fagurt veður er á Flateyri í dag ogfátt sem minnir á ógnaratburðinn fyrir tíu árum. Hann er þó ofarlega í hugum manna og hans er minnst á margvíslegan hátt í dagskrá sem stendur í allan dag og lýkur með samkomu í kirkjunni sem hefst klukkan átta í kvöld.

Til Flateyrar streyma gestir, bæði brottfluttir Flateyringar, björgunarsveitarmenn sem komu að málum fyrir tíu árum og fleiri. Sérstakur gestur Flateyringa á þessum degi er frú Vigdís Finnbogadóttir, fyrrverandi forseti Íslands, sem skipar stóran sess í hjörtum íbúanna eins og þeir í hennar. Hún mun fara um bæinn í dag og skoða þá uppbyggingu sem verið hefur og taka þátt í og skoða sýningar og hlýða á tónlist sem flutt verður.