Kornakrar fallnir víða um land

Kornakrar féllu víðast hvar á Norðurlandi um helgina og einnig í sumum héruðum á Vesturlandi. Verst urðu bændur úti í Skagafirði þar sem aðeins var búið að þreskja fjórðunginn af um 400 hekturum. Einnig urðu Eyfirðingar illa úti, en þar voru um 180 hektarar af 500 ekki komnir í hús. Bændur í þessum héruðum hyggjast þó reyna að ná inn uppskerunni. "Við látum nú ekki trufla okkur smáatriðin hérna í Skagafirði," segir Gunnar Sigurðsson á Stóru-Ökrum. "En það verður seinlegra að ná því." Svo fremi að þreskivélarnar geti ekið um akurinn er hægt að ná uppskerunni, en þó þarf að aka þeim mun hægar. Tíðarfarið á Norðurlandi hefur verið kornbændum mjög óhagstætt. Mikil úrkoma hefur verið í ágúst og kalt í september. "Við höfum verið með sunnlenskt veður síðan í ágústbyrjun, endalausar rigningar, og kunnum ekkert á það," segir Gunnar á Stóru-Ökrum. Úr því sem komið er vill hann helst það fari að frjósa til að þreskivélarnar geti farið um akurinn. Bændur eru almennt ekki tryggðir fyrir skemmdum á uppskeru. Á Austurlandi er talið að kornakrar hafi víðast staðið veðrið af sér, en þar kvarta menn einnig undan vætutíðinni og hafa áhyggjur af því að ekki takist að ná allri uppskerunni í hús. Kornskurði er hins vegar að mestu lokið á Suðurlandi, en það slapp að mestu við óveðrið síðustu daga. Fyrirfram var búist við því að kornuppskera ársins í ár yrði um 11.000 tonn, en þá var búið að taka tillit til þess að sumarið var ekki jafnhlýtt og síðustu sumar þar á undan. Búast má við því að uppskeran verði nokkuð minni. Alls var korni sáð í 3300 hektara á landinu í vor, en nú eru nokkur hundruð þeirra fallnir.