Sterkasta vígi þýskra krata fallið

Eftir 39 ára samfleytta valdatíð jafnaðarmanna tókst kristilegum demókrötum (CDU) loks í gær að velta þeim úr sessi í Nordrhein-Westfalen, sem með um 18 milljónir íbúa er langfjölmennast hinna 16 sambandslanda Þýskalands. Í kosningunum til héraðsþingsins urðu kristilegir demókratar langstærsti flokkurinn með um 45 prósent atkvæða. Þeir munu því undir forystu Jürgens Rüttgers halda um stjórntaumana í Düsseldorf næstu fimm árin, reyndar með fulltingi frjálslyndra demókrata sem fengu um sex prósent atkvæða. Græningjar, sem undanfarið kjörtímabil voru í samsteypustjórn með jafnaðarmönnum, fengu einnig um sex prósenta fylgi. Fylgisaukning kristilegra demókrata frá því í síðustu kosningum er um átta prósentustig en fylgi jafnaðarmanna í þessu rótgróna vígi þeirra hefur ekki verið minna í kosningum síðan árið 1954. Það var nú rúm 37 prósent. Frá því árið 1999 hafa jafnaðarmenn tapað héraðsþingkosningum í sjö sambandslöndum. Þessi "ósigurganga" þeirra er aðallega rakin til þess hve litlum árangri tilraunir ríkisstjórnarinnar til að efla hagvöxt og draga úr atvinnuleysi hafa skilað. Fyrir kosningarnar í Nordrhein-Westfalen lýstu kristilegir demókratar þær mikilvægan áfanga að því að koma "rauð-grænu" ríkisstjórninni í Berlín frá völdum í næstu Sambandsþingkosningum. Eftir yfirlýsingu Gerhards Schröders kanslara í gær um að kosningunum skyldi flýtt til komandi hausts er ljóst að CDU hefur færst allverulega nær þessu markmiði sínu. Flýting kosninganna þýðir ennfremur að nær öruggt er að Angela Merkel, formaður CDU, verði kanslaraefni flokksins. Hugsanlegir innanflokkskeppinautar hennar um það hlutverk, þar á meðal Edmund Stoiber í Bæjaralandi sem var kanslaraefnið fyrir síðustu kosningar, munu að mati stjórnmálaskýrenda draga sig í hlé og fylkja liði að baki Merkel til að hámarka möguleika flokksins á því að hafa betur í stuttri og snarpri kosningabaráttu.