Síldin komin inn í lögsöguna

Íslensk og færeysk skip eru nú að veiðum skammt út af Austfjörðum en þar hefur norsk-íslenska síldin veiðst vel frá því íslensku skipin héldu til veiða eftir sjómannadag. Í síðustu viku voru síldarmiðin um 160 sjómílur út af Austfjörðum en í gær voru flest skipanna í góðri veiði á svæði sem er 47 til 50 sjómílur út af Norðfjarðarhorni. Sveinn Sveinbjörnsson, fiskifræðingur hjá Hafrannsóknastofnun, segir að norsk-íslenska síldin hafi ekki gengið svo langt inn í íslensku lögsöguna síðan veiðar á henni hófust að nýju fyrir um áratug og því auknar líkur á að síldin sé að taka upp sitt gamla göngumynstur þegar síldarævintýrið stóð sem hæst. Gunnþór B. Ingvason, aðstoðarmaður forstjóra Síldarvinnslunnar, segir að síldin veiðist bæði í nót og troll en flest skipin séu með troll. "Það er ekki nema fjögurra tíma sigling á miðin frá Neskaupstað og síldin er mjög stór og góð, allt að 400 gramma demantssíld, og fer megnið í flökun og frystingu," segir Gunnþór.