Fullnægingarvandi bundinn erfðum

Breskir vísindamenn telja sig hafa fundið út að fullnægingarvandi kvenna kunni að tengjast erfðum. Breska ríkisútvarpið, BBC, greinir frá rannsókn tveggja vísindamanna á 4.000 kvenkyns tvíburum á aldrinum 19 til 83 ára sem leiðir í ljós að fullnæging kvenna er ekki einvörðungu tengd sálarlífi og félagslegum þáttum líkt og sumir hafa haldið fram. Þeir þennan mun á milli kvenna geta hafa þróast til að gera þeim kleift að finna sem hentugastan maka til að auka kyn sitt með. Þá telja þeir að verði greint hvaða gen ráða þessum þáttum mætti mögulega nota þá vitneskju til að þróa lyf sem hjálpuðu konum að fá fullnægingu. Niðurstöðurnar benda einnig til þess að konur sem auðvelt eiga með að fá fullnægingu séu líklegri til að sætta sig við síður bólfiman maka. Helmingur tvíburanna var eineggja og deila því sama erfðaefni, en hinn helmingurinn ekki. Konurnar voru svo beðnar um að svara skriflega spurningum um ástarlíf sitt.