Dómsmálaráðherra ráðstafar einn átta milljónum til mannréttindamála

Dómsmálaráðherra verður nú einn að ráðstafa átta milljónum til mannréttindamála eftir breytingar á fjárlagafrumvarpinu í meðförum fjárlaganefndar. Fjórar milljónir á forræði utanríkisráðherra færast á hendur Björns Bjarnasonar. Þingmaður Samfylkingarinnar segir þetta ekki djarfmannlegt af nýjum formanni Sjálfstæðisflokksins.

Átta milljónir sem áður runnu beint til að reka mannréttindaskrifstofu Íslands fóru á forræði tveggja ráðuneyta eftir breytingar á fjárlögum í fyrra. Þetta varð til þess að skrifstofan varð að leita á náðir ráðuneytanna um féð og eyrnamerkja það einstökum verkefnum. Leikar fóru síðan svo að skrifstofan fékk ekki krónu frá utanríkisráðuneytinu og einungis rúmar tvær milljónir frá dómsmálaráðuneytinu. Um tíma blasti við að loka þyrfti skrifstofunni en félagasamtök hlupu undir bagga. Þær breytingar hafa nú verið gerðar í meðförum fjárlagafrumvarpsins í fjárlaganefnd að fjórar milljónir sem utanríkisráðuneytið átti að ráðstafa flytjast nú alfarið til dómsmálaráðherra. Þingmaður Samfylkingarinnar segir þetta ekki bera vott um djörfung.

Helgi Hjörvar, þingmaður Samfylkingarinnar, segir það vekja eftirtekt að nýr formaður Sjálfstæðisflokksins víkur sér undan því að taka afstöðu til fjárveitinga til mannréttindaskrifstofunnar. Eins og menn muna þá gengu Davíð Oddsson og Björn Bjarnason hart fram í því að skera niður fjárveitingar til stofnunarinnar af því að hún hafði leyft sér að gagnrýna stjórnarfrumvarp en nú lætur Geir flytja fjárveitinguna úr utanríkisráðuneytinu og yfir í dómsmálaráðuneytið, augljóslega af því að hann treystir sér hvorki til að veita mannréttindaskrifstofunni fjárstuðning né til þess að neita henni um hann.

Helgi segir að fjárveiting fyrrum utanríkisráðherra hafi legið ónotuð að mestu. Helgi Hjörvar segir jafnframt að núna virðist Geir hvorki treysta sér til að fylgja fram þeirri stefnu né að sýna þá djörfung að láta mannréttindaskrifstofuna hafa þann fjárstuðning sem að áður var um samið og brjóta þannig blað hvað varðar stefnu Sjálfstæðisflokksins gagnvart mannréttindaskrifstofunni. Hann hefði vonast eftir meiri djörfung af nýjum formanni flokksins en hann vísar skítverkunum greinilega á Björn Bjarnason.