Búist við sviptingum í íbúaþróun á þessu ári

Búist er við að íbúum á Íslandi fjölgi tölvert á þessu ári umfram það sem verið hefur allmörg undanfarin ár. Þá flytja fleiri frá höfuðborgarsvæðinu en til þess í fyrsta sinn nærri 20 ár.

Þetta kemur fram ritinu Þjóðarbúskapnum sem Hagstofan hefur sent frá sér og fjallað er um í vefriti fjármálaráðuneytisins. Þar kemur fram að reiknað er með millilandaflutningar auki íbúafjöldann á Íslandi um tvö þúsund sem er töluvert umfram metárið 2000 þegar 1700 fleiri fluttu hingað en fóru héðan. Þá eru ótalinn sá fjöldi sem fæðist umfram þá sem deyja sem er að minnsta kosti annað eins samkvæmt Hagstofunni.

Þá kemur einnig fram í Þjóðarbúskapnum að aðfluttir erlendir ríkisborgara hafa aldrei verið fleiri en það sem af er þessu ári og munar mest um þá fjölmörgu erlendu starfsmenn sem komið hafa til landsins vegna virkjana- og álversframkvæmda á Austurlandi. Alls höfðu 905 flutt til Austurlands frá útlöndum á fyrstu níu mánuðum ársins og eru það 19 prósent af öllum aðfluttum. Þá hafa tvö þúsund og átta hundruð flutt til höfuðborgarsvæðisins á sama tímabili sem er met.

Það vekur auk þess athygli að þótt höfuðborgarsvæðið hafi tekið á móti 3100 manns á fyrstu níu mánuðum ársins flytja fleiri þaðan og út á land og munar þar rúmlega hundrað manns. Er þetta mikil breyting frá því sem verið hefur en í nær tvo áratugi hafa fleiri flutt af landsbyggðinni til höfuðborgarinnar en öfugt. Margir sem flutt hafa af höfuðborgarsvæðinu hafa farið á Suðurnesin en einnig sækja margir á Suðurland og upp í Borgarfjörð. Þykir þetta renna stoðum undir þá fullyrðingu að höfuðborgarsvæðið sé að stækka og nái nú frá Þjórsá og upp í Borgarfjörð.