Líklega prófkjör hjá VG á Akureyri

Akureyrarfélag Vinstrihreyfingarinnar - græns framboðs mun að öllum líkindum efna til prófkjörs til að raða í fjögur efstu sæti framboðslista flokksins fyrir næstu bæjarstjórnarkosningar. Tillaga þess efnis verður rædd á fundi í félaginu næsta mánudag og er talið líklegt að hún verði samþykkt.

Valgerður Bjarnadóttir hefur setið í bæjarstjórn fyrir VG á þessu kjörtímabili en flokkurinn á einn bæjarfulltrúa í bæjarstjórn Akureyrar. Valgerður kveðst ekki búin að ákveða hvort hún gefi áfram kost á sér í efsta sætið en samkvæmt tillögunni um prófkjör er frestur til að skila inn framboðum til 1. desember. Prófkjörið sjálft verður svo haldið um miðjan janúar ef af líkum lætur.