Ekkert þokast í máli Arons Pálma

Ekkert hefur þokast í máli Arons Pálma Ágústssonar frá því náðunarbeiðni hans var hafnað í byrjun október. Utanríkisráðuneytið kveðst ekki sjá sér fært að aðhafast í málinu en það segja forsvarsmenn RJF-hópsins vonbrigði enda hefði fyrir löngu átt að vera búið að gera málið pólitískt. Aron gefst þó ekki upp.

Fylkisstjórinn í Texas hafnaði sem kunnugt er náðunbeiðni Arons Pálma Ágústssonar sem dæmdur var í tíu ára fangelsi í fylkinu fyrir átta árum. Aron heldur enn til í Beaumont í Texas og segir Einar S. Einarsson, talsmaður RJF-hópsins, að Aron eigi nú að óbreyttu eftir að afplána tæp tvö ár í stofufangelsi.

Sjálfur telur Aron vikurnar og reiknast nú til að hafa lokið 411 vikum af dóm sínum. Það er 411 vikum meira en Aron hefði þurft að afplána hér á landi fyrir brot sitt. Aron er nú í háskólanámi í sálfræði en hefur sökum nýfengins áhuga á líkamsrækt og vilja til að koma sér í betra form ákveðið að taka heilsurækt sem aukafag. Árangur þessa þrautseiga unga manns er enda slíkur að strax eru fokin ein fimm kíló, og það á einungis nokkrum vikum.

RJF-hópurinn hefur ásamt velunnurum staðið straum af háskólanámi Arons sem kostar ekki undir hálfri milljón á ári. Einar S. Einarsson segir ekkert hafa þokast varðandi náðun Arons eða heimkomu. Síðasta höggið hafi komið þegar utanríkisráðuneytið íslenska tjáði hópnum að þar á bæ yrði ekkert aðhafst frekar. Sú ákvörðun kom í kjölfar bréfaskipta ráðuneytisins við bandarísk stjórnvöld.

Einar segir það vonbrigði að íslensk stjórnvöld skuli ekki fyrir löngu hafa gert málið pólitískt og þannig krafið Bandaríkjamenn um svör og lausn drengsins, annað sé hneisa. Ættingjar Arons og vinir í RJF-hópnum eru í daglegu sambandi við Aron sem þrátt fyrir mótbyrinn gengur brattur til skóla á hverjum degi.