Fjárhagslega háð sambýlismanni sínum

Í gær sagði Stöð 2 frá fólki sem hefur rétt yfir 100 þúsund krónur í mánaðarlaun. Í dag hitti fréttastofan starfskonu á leikskóla sem segist háð sambýlismanni sínum vegna lágra launa. Þegar hún var ein átti hún enga möguleika á að kaupa sér íbúð og varð að selja bílinn.

Hildur Sveinsdóttir er 27 ára og hún hefur um 125 þúsund krónur í laun á mánuði eftir fjögura ára starf. Síðan hún hóf störf hefur hún náð að hífa launin sín örlítið upp með námskeiðum og starfsaldri en í upphafi voru þau 98 þúsund krónur fyrir átta tíma vinnu. Hún fékk þó alltaf einn tíma í yfirvinnu þar sem hún sá um að loka.

Á þeim tíma leigði Hildur íbúð og rak bíl sem hún síðan varð að gefa upp á bátinn vegna of mikils kostnaðar. Hún gat ekki heldur keypt sér íbúð með nokkru móti.

Hún telur sig háða sambýlismanni sínum vegna launa sinna. Ef hún myndi standa uppi ein í dag þá gæti ég ekki gert það sem hún er að gera í dag og halda óbreyttum framtíðarplönum.

Hildur segir erfitt fyrir margt fólk að koma undir sig fótunum í dag. Hún segir líka skuldasöfnun ungs fólks ekki bara vera vegna ofneyslu. Sumir séu einfaldlega á svo lágum launum að þeir nái ekki endum saman, og það þurfi bara eitthvað lítilvægt að koma upp á svo fólk sé komið í skuldir.