Gistiskýlið yfirfullt í kuldanum

Gistiskýli fyrir heimilislausa í höfuðborginni yfirfylltist í nótt og þurftu starfsmenn að taka við fleirum en húsrúm leyfði, til að vísa ekki fólki út í nístandi kuldann. Frostið í nótt fór niður í fimm gráður. Útigangsmenn skipta tugum í Reykjavík. Þeim hefur fjölgað verulega að undanförnu og oft þarf að vísa þeim frá.

Gistiskýli er rekið í höfuðborginni til að skjóta skjólshúsi yfir þá sem ekki eiga í önnur hús að venda. Heimilislaus maður sem ekki vill láta nafn síns getið, segir gott að geta verið i gistiskýli á nóttinni, en á daginn fer hann á kaffistofu Samhjálpar til að fá sér að borða. Hann segir flesta daga eins hjá sér; hann sofi í gistiskýlinu en eyði deginum á kaffistofu Samhjálpar.

Í gistiskýlið að Þingholtsstræti, sem velferðarsvið Reykjavíkurborgar hefur rekið frá því í haust, komast færri að en vilja, en þar er pláss fyrir fimmtán manns.

Jónas Jónsson forstöðumaður Gistiskýlisins segir æ fleiri óska eftir húsaskjóli í gistskýlinu og síðustu vikur hafi þurft að vísa fólki frá. Hann segist greina aukningu heimilislausra á síðustu árum.

Reykjavíkurdeild Rauða kross Íslands hefur í tæpt ár rekið Konukot við Eskihlíð, en þangað geta heimilislausar konur leitað, sem oftar en ekki eru að koma úr meðferð eða hafa nýlokið afplánun. Fimm til sex konur eru þar að jafnaði, en að sögn verkefnisstjóra Konukots, hafa um fjörutíu konur gist þar frá því húsið var opnað. Þeir sem leita til gistiskýlanna eru í misjöfnu ástandi.

Unnið er að því að finna stærra og hentugra húsnæði fyrir gistiskýlið, hann segir borgaryfirvöld hafa tekið jákvætt í að aðstoða við það.