Friður í meirihlutann

Meirihlutasamstarf Sjálfstæðismanna og Vinstri grænna í sveitarstjórn Skagafjarðar er ekki lengur í hættu og sömuleiðis starf oddvita Vinstri grænna sem sveitarstjóra í sveitarfélaginu. Sveitarstjóri baðst afsökunar á ummælum um oddvitann.

Þetta varð ljóst eftir að oddviti sjálfstæðismanna, Gísli Gunnarsson, dór til baka tillögu sína um að vísa Ársæli Guðmundssyni oddvita VG úr stóli sveitarstjóra. Deilur oddvita flokkanna hófust fyrir rúmum mánuði í kjölfar beiðni sveitarstjóra um styrk til að sækja námsstefnu sveitarstjórnarmanna í Brussel.

Var sveitarstjóra neitað um styrk að frumkvæði Gísla Gunnarssonar oddvita og lét Ársæll í kjölfarið hörð orð falla um samstarfsmann sinn Gísla í grein á vef sveitarfélagsins. Gísli svaraði um hæl og sagði Ársæl hafa farið offari í gagnrýni sinni á sig og sveitarstjórn og boðaði í kjölfarið tillögu sem kvað á um að Ársæli yrði vísað úr starfi svetiarstjóra.

Þegar á reyndi var svo umrædd tillaga aldrei lögð fram til atkvæða og hún síðan dregin til baka. Gísli Gunnarsson segir ástæður þess vera einfaldar: Ársæll hafi beðist afsökunar á ummælum sínum, því sé grundvöllur brottrekstrar ekki lengur til staðar. Meirihlutasamstarf flokkanna mun því enn um sinn halda.