Annasamt hjá Rvk. lögreglu í nótt

Ráðist var á 26 ára gamlan mann í miðbæ Reykjavíkur á fimmta tímanum í nótt. Kallað var til lögreglu sem stöðvaði barsmíðarnar. Fórnarlambið var flutt á Landspítala Háskólasjúkrahús þar sem gert var að sárum hans en talið er að bein hafi brotnað í andliti mannsins. Árásarmaðurinn var fluttur í fangageymslur og verður yfirheyrður nú í morgunsárið eða þegar mesta víman er runnin af honum. Ekki er enn um ástæðu árásarinnar og er málið nú í rannsókn. Annasamt var hjá lögreglunni í Reykjavík í nótt og voru þrettán manns handteknir vegna hassreykinga. Þá voru fjórir ökumenn stöðvaðir vegna ölvunar. Að öðru leyti var rólegt hjá lögreglunni víðs vegar um landið. Maður var þó stöðvaður á Suðurlandsvegi, rétt vestan við Selfoss á fjórða tímanum grunaður um ölvun. Svo reyndist rétt og var maðurinn færður á lögreglustöðina til skýrslutöku. Lágmarkssekt við ölvunarakstri hér á landi er fimmtíu þúsund krónur og réttindasvipting í þrjá mánuði. Hámarksrefsing er hins vegar árssvipting og eitt hundrað þúsund krónur.