Aukning í sölu nýrra bíla

Mikil aukning hefur verið í sölu á nýjum bílum á Vestfjörðum það sem af er árinu. Samkvæmt upplýsingum frá ökutækjaskrá hefur sala á nýjum bílum á landinu öllu aukist um 52%, en á Vestfjörðum um heil 74%. Vestfirðir eru þar með yfir landsmeðaltal í aukningu í fyrsta sinn síðan árið 1997. Þetta kemur fram á vef Bæjarins besta í dag. Mest seljast Toyota-bílar en þeir eru 20 prósent seldra bíla. Hyundai kemur þar á eftir með 12 prósent seldra bíla, Volkswagen með 10,6 prósent, Mitsubishi með 10,1 prósent, Nissan með 7,9 prósent og aðrir með minna. Í ár hafa 236 bílar verið nýskráðir inn á Vestfirði miðað við 130 á sama tíma í fyrra.