Tveir Íslendingar til Pakistan

Tveir Íslendingar hafa farið eða eru á leið til hjálparstarfa í Pakistan. Rauði kross Íslands hefur sent Sólveigu Ólafsdóttur sendifulltrúa til hjálparstarfa á hamfarasvæðunum. Hún mun starfa sem upplýsingafulltrúi fyrir Alþjóða Rauða krossinn og er væntanleg til Islamabad á sunnudag. Jón Hafsteinsson, slökkviliðs- og sjúkraflutningamaður, heldur áleiðis til Pakistan í byrjun næstu viku þar sem hann mun starfa á vegum Alþjóða Rauða krossins við sjúkraflutninga. Áætlað er að Jón verði að störfum til 20. desember. Hann hefur áður starfað fyrir Alþjóða Rauða krossinn í Kosovo og Albaníu árið 1999 þar sem hann flutti mat og önnur hjálpargögn.