Kjarasamningar í uppnámi

Kjarasamningar eru í uppnámi, skattur á tekjum undir 175 þúsund krónum á að verða 14,75 prósent, og ef til vill stendur lítið íslenskt myntsvæði og óstöðugt efnahagslíf vaxtalækkunum fyrir þrifum. Þetta er á meðal þess sem kemur fram í ályktanadrögum ársfundar Alþýðusambands Íslands. „Kjarasamningar á almennum vinnumarkaði eru í uppnámi vegna mikillar verðbólgu og ójafnvægis í hagkerfinu. Við þessar aðstæður er sá ávinningur sem samningarnir áttu að skila launafólki að mestu horfinn." Svo segir í inngangi að tillögu um ályktun aðalfundar Alþýðusambandsins um kjaramál en búast má við því að hart verði tekist á í þeim málaflokki á næstu vikum. Einnig liggur fyrir fundinum ályktunartillaga um skattamál þar sem segir: „Forgangsverkefnin eru að lækka virðisaukaskatt á matvæli, hraða hækkun barnabóta og taka upp lægra skattþrep á lægri tekjur." Í ályktuninni er því mótmælt að skattalækkanir ríkisstjórnarinnar gagnist aðallega þeim sem hæstar hafi tekjurnar. Þannig er gerð tillaga um það í greinargerð með ályktanadrögunum að tekinn verði upp þrepaskiptur skattur og að þeir sem hafi tekjur undir 175 þúsund krónum greiði einungis 14,75 prósenta tekjuskatt. Í ályktunardrögum um lánamál fagnar ársfundur ASÍ jákvæðum breytingum á lánamarkaði en en krefst þess að áfram verði stigin markviss skref á allra næstu árum í að færa íslensk lánakjör að því sem gerist í þeim löndum sem við viljum bera okkur saman við. Í ályktunardrögunum er það sagt mikilvægt að skoðað verði hvort lítið íslenskt myntsvæði og óstöðugt efnahagslíf standi í vegi fyrir lækkun vaxta til lengri tíma. Einnig liggja fyrir fundinum drög að ályktunum um stefnu ASÍ í jafnrétti karla og kvenna, tillaga um lágmarksréttindi í sjúkrasjóðum, tillaga um sérstakt kynningarátak er varðar sterkari ímynd verkalýðshreyfingarinnar og tillaga um aðgerðir til að auka skilvirkni í starfi Alþýðusambandsins.