Óttast að hætta skapist

Steinnunn Valdís Óskarsdóttir borgarstjóri segir tilmæli sín vegna kvennafrídags miðast að því að þjónusta verði ekki skert þannig að hætta skapist. Hún lýsir yfir stuðningi við að konur leggi niður störf, sæki börnin sín á leikskóla og frístundaheimili og taki þátt í aðgerðunum. Í fréttum Bylgjunnar í gær var greint frá því að leikskólastarfsmenn eru ósáttir við tilmæli Steinunnar Valdísar um að stjórnendur á vinnustöðum borgarinnar bregðist jákvætt við óskum kvenna um að leggja niður störf á mánudag vegna kvennafrídagsins án þess að skerða nauðsynlega þjónustu. Þeir segja slíkt ómögulegt enda skerðist þjónustan óhjákvæmilega ákveði leikskólastarfsmenn að taka þátt í aðgerðunum sem fyrirhugaðar eru á kvennafrídaginn. Steinunn Valdís segist einungis vera með yfirlýsingu sinni að koma í veg fyrir að hættuástand myndist. Hún hafi fyrst og fremst verið að vísa til þjónustu þar sem gæti verið um líf eða dauða að ræða. Flokksfélagi Steinunnar, Stefán Jón Hafstein, formaður menntaráðs Reykjavíkurborgar, hvetur hins vegar karlmenn til að sýna ábyrgð á börnum í leik- og grunnskólum þegar kvennafrí hefst. Hann segir það hluta af jafnréttisbaráttu samfélagsins að karlmenn taki meiri ábyrgð á uppeldi og ummönnun barna.