Tillögum minnihlutans hafnað

Meirihluti leikskólanefndar Kópavogs hafnaði í gær tillögum minnihlutans um sértækar aðgerðir til að bregðast við vanda á leikskólum bæjarins vegna manneklu. Börn á tveimur leikskólum í Kópavogi eru nú heima í eina viku á mánuði vegna lokunar deilda. Á fleiri leikskólum er mikið álag á starfsfólki, þó að ekki hafi enn þurft að grípa til þess ráðs að loka deildum. Á fundi leikskólanefndar Kópavogs í gær lagði fulltrúi Samfylkingarinnar fram tillögu í nokkrum liðum um hvernig mætti bregðast við því ástandi sem upp er komið á leikskólum Kópavogs. Í tillögunni var meðal annars lagt til að allt starfsfólk fengi eingreiðslu vegna mikils álags í haust. Þá var einnig lagt til að starfsfólk leikskóla fengi gjaldfrjálsa leikskólavist fyrir börnin sín og eins yrði það metið til launa ef starfsmaður hefði lokið hluta náms frá Kennaraháskólanum eða uppeldisnámi frá Háskóla Íslands. Inni í tillögunni var líka gert ráð fyrir undirbúningstíma fyrir leiðbeinendur. Fulltrúar Sjálfstæðisflokks og Framsóknarflokks í leikskólanefndinni felldu tillöguna. Að óbreyttu fá því leiðbeinendur á leikskólum Kópavogs ekki sérstaka kjarabót umfram kjarasamninga. Næsta miðvikudag greiða þeir atkvæði um nýja kjarasamninga, sem starfsmannafélag Kópavogs skrifaði undir hjá ríkissáttasemjara í gær.