Afhentu Stígamótum 1,5 milljónir

Stígamót tóku á móti 1,5 milljóna króna styrk í dag, en féð safnaðist á uppskeruhátíð byggingariðnaðarins í samvinnu við Steypustöðina. Þar voru seld vinabönd með áletruninni „Sombody to love“ til styrktar Stígamótum. Vísar texti bandanna í texta hljómsveitarinnar Queen, en tónlist þeirra var þema hátíðarinnar að þessu sinni. Fjölmörg fyrirtæki og einstaklingar gáfu í söfnunina, þar á meðal voru JB Byggingafélag, Stafna á milli, Sérverk, Bygg Ben, S.Þ. Verktakar, Rís, Fasteignasalan Klettur, Steypustöðin og Húsasmiðjan ásamt fleiri fyrirtækjum og einstaklingum sem létu öll vel af hendi rakna. Það voru eigendur JB Byggingafélags, þau Sigurður Sigurgeirsson og Vilborg Hjaltested, sem stóðu fyrir söfnuninni og áttu hvað stærstan þátt í að ýta framtakinu úr vör.