Framkvæmdum 365 mótmælt

Íbúar í Hlíðahverfi hafa sent kæru til úrskurðarnefndar skipulags- og byggingamála vegna framkvæmda þrjú hundruð sextíu og fimm miðla við Skaftahlíð. Framkvæmdunum var harðlega mótmælt á fjölmennum íbúafundi í gærkvöldi. Fyrirhugað er að reisa tæplega tvö þúsund fermetra bílastæðahús og átta hundruð fermetra tengibyggingu á lóð fasteignafélagsins Stoða á lóðinni við Skaftahlíð 24, þar sem þrjú hundruð sextíu og fimm miðlar eru til húsa. Íbúar eru mjög mótfallnir þessum framkvæmdum, þar sem þeir telja að umferð aukist um tíu prósent á svæðinu, auk þess sem mikill bílastæðavandi skapist. Það var mikill hiti í fólki á fjölmennum íbúafundi sem haldinn var í Ísaksskóla vegna málsins í gærkvöldi. Íbúarnir hafa ráðið lögfræðing til starfa fyrir sig og sent kæru til úrskurðarnefndar skipulags- og byggingamála, þar sem þeir krefjast þess að framkvæmdirnar verði stöðvaðar meðan málið er til meðferðar.