Stendur ekki við orð sín

Bæði Halldór Ásgrímsson, forsætisráðherra, og Þorgerður Katrín Gunnarsdóttir, menntamálaráðherra, sögðu í vor að lagafrumvarp sem væntanlegt sé um fjölmiðla, verði byggt á skýrslunni sem fjölmiðlanefndin lagði fram í vor. Þorgerður Katrín sagði síðan á Alþingi í gær að ekki væri hægt að tryggja hver endanleg niðurstaða Alþingis verði. Þingmenn stjórnarandstöðunnar sökuðu Þorgerði og Geir H. Haarde, um að vilja rjúfa sátt, sem náðst hefði með niðurstöðu þverpólitískrar fjölmiðlanefndar síðastliðið vor. Er það vegna þess að bæði Geir og Þorgerður hafa sagt að það hlutfall, sem einstakir aðilar megi eiga í fjölmiðlafyrirtækjum, eigi að vera lægra en 25%. Stjórnarandstaðan er þessu auðvitað ekki sammála og Kolbrún Halldórsdóttir, þingmaður stjórnarandstöðunnar segir Þorgerði Katrínu ekki standa við orð sín. Kolbrún sagði að Þorgerður Katrín hefði fagnað pólitískri sáttagerð fjölmiðlanefndar síðastliðið vor og sagði þá berum orðum í Þjóðmenningahúsinu að hún myndi leggja fram frumvarp sem byggði á tillögum þessarar nefndar. Síðan sagði Þorgerður á þingi í dag að hún væri að varpa fram sinni persónulegu skoðun og lætur þá ekki í það skína að frumvarpið verði með öðrum hætti en hún hafði gefið í skyn í vor. Því sagði Kolbrún alveg óljóst hvað ætti eftir að koma út úr málinu. Hún sagði einnig undarlegt að menntamálaráðherra gæti ekki staðið við eða með orðum sínum.