Stúdentaráð mótmælir landsfundi

Stjórn Stúdentaráðs Háskóla Íslands harmar ályktun landsfundar Sjálfstæðisflokksins þar sem flokkkurinn leggur til að skólagjöld verði tekin upp í opinberum háskólum. Stjórn ráðsins lítur þessa ályktun alvarlegum augum í ljósi þess að Sjálfstæðisflokkurinn fer með ráðuneyti menntamála auk formennsku í menntamálanefnd Alþingis. Stjórnin telur það með öllu ótækt að taka upp skólagjöld við þjóðskólann og harmar að flokkurinn skuli á svo eindreginn hátt taka afstöðu með skólagjöldum. Upptaka slíkra gjalda myndi draga úr jafnrétti til náms við Háskóla Íslands en víðtæk sátt hefur ríkt um að skólinn sé öllum landsmönnum opinn og teljum við mikilvægt að halda því þannig.