Sameining nyrst í Eyjafirði?

Þrátt fyrir að sameining sveitarfélaga í Eyjafirði hafi verið felld í sameiningarkosningunum um þar síðustu helgi, hafa sveitarfélögin Siglufjörður og Ólafsfjörðru ákveðið að reyna að sameinast. Kosningaþáttaka var góð í báðum sveitarfélögum og þau voru einnig þau einu sem samþykktu sameininguna. Forystumenn Siglufjarðar og Ólafsfjarðar hafa ákveðið að reyna að sameina sveitarfélögin tvö, eftir að hafa átt fund með Árna Magnússyni félagsmálaráðherra. Í gær var skipuð nefnd sem ætlað er að vinna í þeim málum. Sameining sveitarfélaganna er háð því að jarðgöng verði gerð um Héðinsfjörð. Runólfur Birgisson, bæjarstjóri Siglfirðinga, segir að líklega verði byrjað á göngunum um mitt næsta ár. Runólfur sagði aðalhagræðinguna vera þá að ekki nema 12 kílómetrar skildu að bæjarfélögin þegar göngin væru komin. Hagræðingin er fólgin bæði´í sóknarfærum í atvinnurekstri sem og þjónustu.