Fá frí vegna baráttudags kvenna

Verzlunarmannafélag Reykjavíkur hefur ákveðið að gefa starfsmönnum sínum frí frá klukkan 14.08 á mánudaginn kemur í tilefni af kvennafrídeginum, en þá eru liðin 30 ár frá því að tugþúsundir kvenna söfnuðust saman í miðborginni og kröfðust jafns réttar á við karla. Starfsmenn VR ætla allir sem einn að flykkjast niður í miðbæ þar sem fyrirhuguð er kröfuganga og viðamikil dagskrá vegna tímamótanna, en aðstandendur dagsins hafa bent á að miðað við núverandi launamun kynjanna hafi konur unnið fullan vinnudag klukkan 14.08. Að sögn Elíasar G. Magnússonar, forstöðumanns kjarasviðs VR, hefur verið töluvert um fyrirspurnir frá fyrirtækjum sem eru að íhuga að fara að fordæmi VR og segist Elías vona að þau verði sem flest. Þá hvetur VR vinnuveitendur til að sýna velvilja í verki og gefa starfsfólki sínu frí umræddan dag frá kl. 14.08. Þá hefur Steinunn Valdís Óskarsdóttir borgarstjóri beint því til stjórnenda á vinnustöðum borgarinnar að bregðast jákvætt við óskum kvenna um að leggja niður vinnu á mánudag til að taka þátt í aðgerðunum og hún hvetur konur um að komast að samkomulagi við samstarfsmenn og stjórnendur um tilhögun þannig að nauðsynleg þjónusta skerðist ekki.