Krefst átta milljóna

Lithái, sem gerður var brottrækur héðan af landi 2001, hefur stefnt íslenska ríkinu og krefst rúmlega átta milljón króna í bætur. Árið 1995 nauðgaði og myrti Litháinn ungri konu í heimalandi sínu, en var dæmdur ósakhæfur vegna ofsóknarkennds geðklofa og sendur á réttargæsludeild. Fjórum árum síðar var hann látinn laus, og settist skömmu síðar að á Íslandi. Dómsmálaráðuneytið afturkallaði dvalarleyfi hans þegar upp komst um feril hans, og var hann gerður brottrækur frá Íslandi. Hann kærði þann úrskurð, og dæmdi Hæstiréttur úrskurðinn ógildan í júní í fyrra. Síðan hefur Litháinn sótt um að flytjast aftur til Íslands, en hefur ekki fengið leyfi til þess enn.