Tugir milljóna í uppkaup á húsum

Bolungarvíkurkaupstaður gæti þurft að greiða tugir milljóna úr eigin vasa vegna uppkaupa á húsum sem standa á snjóflóðahættusvæði við Dísarland. Bætur Ofanflóðasjóðs til Bolungarvíkurkaupstaðar vegna uppkaupa á húsum á snjóflóðahættusvæði verða sem nemur markaðsvirði húsanna sem kaupstaðurinn keypti. Þetta er haft eftir Magnúsi Jóhannessyni, stjórnarformanni Ofanflóðasjóðs. Kaupstaðurinn var hins vegar dæmdur til að greiða matsverð fyrir húsin, sem þá var umtalsvert hærra en markaðsverðið. Bætur Ofanflóðasjóðs eru því sem nemur 90 prósentum af lægra verðinu og annan kostnað þarf Bolungarvíkurkaupstaður sjálfur að greiða. Húsin sem um ræðir standa þar sem fyrirhugað er að reisa snjóflóðavarnargarða. Einar Pétursson, bæjarstjóri Bolungarvíkur, segir að ekki hafi enn verið tekin afstaða til þess í bæjarstjórn hvaða skref verði næst stigin í málinu. Hugsanlega komi til greina að áfrýja úrskurði Héraðsdóms um að kaupstaðurinn skuli greiða matsverð til Hæstaréttar. Það komi þá enn frekar til greina ef það reynist rétt að Ofanflóðasjóður áætli bæturnar útfrá markaðsvirði en ekki matsverði. Hann segir verðmuninn á bilinu fimm til sex milljónir á hvert hús, sem sagt á bilinu fimmtán til átján milljónir króna. Eðlilega munar verulega um slíkar upphæðir hjá litlu sveitarfélagi á borð við Bolungarvík. Jafnvel gæti hugsast að kostnaður kaupstaðarins vegna uppkaupanna í Dísarlandinu muni nema tugum milljóna. Einar segir að málið verði skoðað í kjölinn í bæjarstjórn á næstu vikum og ákveðið hvaða skref verða stigin í málinu.